ແນວທາງການຮັບມືກັບມິສາຊີບດູດເງິນໃນບັນຊີ

ໃນຍຸກທີ່ເຕັກໂນໂລຊີທາງການເງິນກ້າວໜ້າ, ຄວາມສະດວກສະບາຍໃນການໃຊ້ຈ່າຍແລະໂອນເງິນກໍມາພ້ອມກັບຄວາມສ່ຽງທີ່ເພີ່ມຂຶ້ນ. ເຖິງວ່າຈະມີລະບົບ ລະຫັດຜ່ານ (Password) ແລະ ລະຫັດ OTP (One-Time Password) ທີ່ໃຊ້ກັນທົ່ວໄປ, ແຕ່ກໍຍັງມີຊ່ອງຫວ່າງໃຫ້ມິສາຊີບສວຍໃຊ້ໄດ້. ບັນຫາດັ່ງກ່າວຈະໝົດໄປຖ້າທຸກຄົນໄດ້ຮັບການປົກປ້ອງດ້ວຍການຢືນຢັນຕົວຕົນແບບຊີວະມິຕິ (Biometric) ທີ່ລົງທະບຽນໄວ້ກັບທະນາຄານ(ບໍ່ແມ່ນທີ່ລົງໄວ້ກັບໂທລະສັບຜູ້ໃຊ້), ເຊິ່ງກໍຄືການ ສະແກນໃບໜ້າ ແລະ ລາຍນິ້ວມື ເພື່ອປ້ອງກັນບໍ່ໃຫ້ບັນຊີຖືກນຳໄປໃຊ້ໃນທາງທີ່ຜິດ.

ບັນຫາໃຫຍ່ຂອງ "ບັນຊີມ້າ" ຈະໄດ້ຮັບການແກ້ໄຂ

ປັດຈຸບັນນີ້, ການຫຼອກລວງທາງອອນລາຍມັກຈະມາໃນຮູບແບບຂອງການ "ດູດເງິນ" ອອກຈາກບັນຊີຂອງຜູ້ເສຍຫາຍ. ມິສາຊີບເຫຼົ່ານີ້ຈະໃຊ້ "ບັນຊີມ້າ" ເຊິ່ງເປັນບັນຊີທະນາຄານຂອງຜູ້ອື່ນທີ່ພວກເຂົາຊື້ມາເພື່ອໃຊ້ເປັນບ່ອນພັກເງິນທີ່ຫຼອກມາໄດ້. ເມື່ອເງິນຖືກໂອນເຂົ້າບັນຊີມ້າແລ້ວ, ມິສາຊີບກໍຈະຮີບຖອນຫຼືໂອນເງິນນັ້ນອອກໄປຢ່າງວ່ອງໄວ ເພື່ອບໍ່ໃຫ້ສາມາດຕິດຕາມໄດ້.

ການແກ້ໄຂບັນຫານີ້ບໍ່ແມ່ນພຽງແຕ່ການເພີ່ມຄວາມລະມັດລະວັງຂອງຜູ້ໃຊ້ງານ, ແຕ່ຕ້ອງແກ້ທີ່ລະບົບການຮັກສາຄວາມປອດໄພຂອງທະນາຄານນຳ. ເຊິ່ງໃນຈຸດນີ້, ການຢືນຢັນຕົວຕົນດ້ວຍ ການສະແກນໃບໜ້າແລະລາຍນິ້ວມື ຈຶ່ງກາຍເປັນວິທີທີ່ມີປະສິດທິພາບສູງທີ່ສຸຸດ.

ການສະແກນໃບໜ້າແລະລາຍນິ້ວມື ເປັນເຄື່ອງມືຕ້ານມິສາຊີບໄດ້ແນວໃດ?

 * ຢືນຢັນຕົວຕົນຂອງເຈົ້າຂອງບັນຊີຕົວຈິງ: ໃນລະບົບໃໝ່ນີ້, ທຸກຄັ້ງທີ່ມີການໂອນຫຼືຖອນເງິນ, ລະບົບຈະກວດສອບດ້ວຍການ ສະແກນໃບໜ້າ ຫຼືສະແກນລາຍນິ້ວມືຂອງຜູ້ໃຊ້ງານທັນທີ. ໃບໜ້າທີ່ສະແກນຕ້ອງກົງກັບໃບໜ້າທີ່ໄດ້ລົງທະບຽນໄວ້ກັບທະນາຄານຕອນເປີດບັນຊີ. ຖ້າໃບໜ້າບໍ່ກົງກັນ, ເງິນກໍຈະບໍ່ສາມາດຖອນຫຼືໂອນອອກໄປໄດ້.

 * ປ້ອງກັນການໃຊ້ "ບັນຊີມ້າ": ມິສາຊີບທີ່ຊື້ບັນຊີມ້າຈະບໍ່ມີທາງໂອນຫຼືຖອນເງິນໄດ້ເລີຍ ເພາະໃບໜ້າແລະລາຍນິ້ວມືຂອງພວກເຂົາບໍ່ກົງກັບຂໍ້ມູນຂອງເຈົ້າຂອງບັນຊີຕົວຈິງ. ການສະແກນໃບໜ້າຈຶ່ງເຮັດໃຫ້ບັນຊີມ້າກາຍເປັນພຽງບັນຊີທີ່ບໍ່ສາມາດໃຊ້ງານໄດ້, ເຮັດໃຫ້ມິສາຊີບບໍ່ສາມາດໃຊ້ບັນຊີເຫຼົ່ານີ້ໄດ້ອີກຕໍ່ໄປ.

 * ປ້ອງກັນການໃຊ້ລະຫັດຜ່ານທີ່ຖືກແຮັກ: ເຖິງແມ່ນມິສາຊີບຈະສາມາດລັກເອົາ ລະຫັດຜ່ານ ແລະ ລະຫັດ OTP ໄປໄດ້, ແຕ່ພວກເຂົາກໍບໍ່ສາມາດລັກເອົາ ໃບໜ້າ ຫຼື ລາຍນິ້ວມື ຂອງເຮົາໄປນຳໄດ້. ຂໍ້ມູນທາງຊີວະມິຕິເຫຼົ່ານີ້ເປັນເອກະລັກສະເພາະບຸກຄົນ, ເຮັດໃຫ້ການລັກລອບເຂົ້າໃຊ້ງານເປັນໄປໄດ້ຍາກທີ່ສຸດ.

ຂໍ້ດີຂອງການໃຊ້ລະບົບນີ້

 * ຄວາມປອດໄພສູງສຸດ: ເຮັດໃຫ້ບັນຊີຂອງທ່ານປອດໄພຈາກການຖືກລັກລອບໃຊ້ງານ, ແມ້ກະທັ້ງລະຫັດຜ່ານຈະຖືກແຮັກ.

 * ສະດວກແລະວ່ອງໄວ: ການສະແກນໃບໜ້າໃຊ້ເວລາພຽງບໍ່ເທົ່າວິນາທີ, ເຮັດໃຫ້ການໂອນ-ຖອນເງິນມີຄວາມວ່ອງໄວ.

 * ຫຼຸດຜ່ອນການຫຼອກລວງ: ເຮັດໃຫ້ມິສາຊີບບໍ່ສາມາດໃຊ້ "ບັນຊີມ້າ" ເພື່ອຟອກເງິນທີ່ຫຼອກມາໄດ້ອີກຕໍ່ໄປ.

ຖ້າສະຖາບັນການເງິນຫຼືທະນາຄານນຳເອົາລະບົບ ການຢືນຢັນຕົວຕົນດ້ວຍການສະແກນໃບໜ້າແລະລາຍນິ້ວມື ມາໃຊ້ໃນການເຮັດທຸລະກຳທາງການເງິນໄດ້ມັນຈະເປັນບາດກ້າວທີ່ສຳຄັນໃນການເພີ່ມຄວາມປອດໄພໃຫ້ແກ່ຜູ້ໃຊ້ງານ ແລະ ເປັນວິທີທີ່ມີປະສິດທິພາບທີ່ສຸດໃນການຕ້ານກັບບັນຫາ "ບັນຊີມ້າ" ທີ່ກຳລັງລະບາດໃນປັດຈຸບັນ. ຖ້າທະນາຄານທຸກແຫ່ງໄດ້ນຳລະບົບນີ້ໄປໃຊ້, ຜູ້ໃຊ້ງານກໍຈະໝັ້ນໃຈໄດ້ວ່າເງິນໃນບັນຊີຂອງຕົນເອງຈະປອດໄພຢ່າງແທ້ຈິງ.

#ຂ່າວໄອທີ #ຄວາມປອດໄພ